ROMONTSCH Sprache umschalten DEUTSCH

La fundaziun

La Fundaziun Pro Laax ei vegnida installada igl onn 1974 dalla vischnaunca. La fundaziun ei confessiunalmein e politicamein neutrala e sustegn projects che han in connex direct cun la vischnaunca da Laax. Ella promova las activitads culturalas cun conceder contribuziuns a persunas ed organisaziuns che tgiran e promovan la cultura, isonzas, tradiziuns, en special il lungatg romontsch.

Sur da nus

Commembers dalla fundaziun ein actualmein Erwin Ardüser (president), Franz Gschwend (vicepresident), Corsin Caduff (projects), Toni Camathias (finanzas) e Christoph Schneller (arcun da tradiziun).

Il secretariat vegn menaus da Romana Brunold.

Ils commembers dil cussegl da fundaziun examineschan las damondas a caschun dallas sedutas ordinarias. Quellas han per regla liug quater gadas ad onn.
Tractadas vegnan damondas che han in connex direct cun la vischnaunca da Laax.
La fundaziun dispona da suandonts mieds finanzials:
  1. eventualas entradas en connex cun la facultad,
  2. in miez pertschien dallas midadas da maun che vegnan incassadas dalla vischnaunca politica el rom da lur ordinaziuns,
  3. contribuziuns voluntarias.
Expensas e contribuziuns che serepetan e che survargan mintgamai ils 10'000.- frs, sco era expensas e contribuziuns unicas sur 30'000.- frs. pretendan il consentiment dalla suprastonza communala.
Expensas e contribuziuns sur 60'000.- frs. pretendan il consentiment dalla radunonza da vischnaunca.

Finamira

  1. Promoziun da stentas culturalas ed infrastructura ella vischnaunca da Laax; contribuziuns a persunas ed organisaziuns che tgiran e promovan la cultura, isonzas, tradiziuns, en special il lungatg romontsch, sco era contribuziuns ad uniuns sportivas.
  2. Acquist da beins cun la finamira da mantener edifecis e parcellas da muntada speciala e segirar terren per praticar sport. Igl ei era pusseivel d’acquistar servituds per contonscher las finamiras nunmadas.
  3. Planisaziun, construcziun e contribuziuns per indrezs publics da sport. Contribuziuns per mantener substanza architectonica preziusa, protecziun da terren sco era concepziun e formaziun sin territori dalla vischnaunca da Laax.
  4. Sustegn per lavurs preziusas, prestaziuns e lavurs d’artists – als quals appartegnan era representants dalla litteratura, dalla poesia e musica, sco era sustegn da sportists.