Casti Lagenberg

Il num Lagenberg vegn mess en connex cun ils lags en siu contuorn e da quels deriva era il num Laax («lages» dal latin lacus = lag). Mintgaton san ins denton era leger che la denominaziun «Langenberg», seigi inspirada dalla liunga collina (Cuolm liung). Las paucas restonzas da mirs sigl areal lain percorscher ch’ei setracta d’in stabiliment spazius. Il baghetg principal consisteva d’ina tuor el nord, d’ina pintga cuort circumdada d’in mir e d’in baghetg d’habitar cunfinont da vart meridiunala. Pli lunsch naven da quella vart existeva in casti vastus sco predustonza ch’era separaus dil baghetg principal tras in foss. Tras la specia dils rests dil mir selai concluder ch’igl edifeci ei vegnius construius en la secunda mesadad dil 13avel tschentaner. Documents screts leutier mauncan.
Dapli informaziuns

Lagenberg ha aunc divers misteris

Sonda, ils 23-10-2021, ha la Fundaziun Platta Pussenta mussau alla populaziun la ruina Lagenberg. Duront la stad ha quella instituziun, en collaboraziun cun la Pro Laax, realisau in project da conservar las ruinas ed arver migeivlamein gl’areal sin la collina amiez igl Uaul Casti.
Dapli informaziuns

Il casti emblidau da Lagenberg

Las restonzas dil mir dil casti denter il vitg da Laax e Murschetg ein vegnidas restauradas. Quei ch’ei denton zuppau sut mescal e tratsch duei era restar leu.

Las dimensiuns digl anteriur casti ein vegnidas tschaffadas dil Survetsch archeologic cantunal en in model 3-D.

Ella contribuziun dil Radio Romontsch dils 9-11-2021 raquentan Corsin Caduff e Murièle Jonglez dalla Fundaziun Platta Pussenta e Christoph Walser dil Survetsch archeologic dil cantun Grischun dalla historia dil casti e dil project dalla sanaziun migeivla dils mirs.
Dapli informaziuns

Ruina dil casti Lagenberg

MATG 2021

Fagei cun nus ina spassegida sigl areal dalla ruina Lagenberg.

FENADUR 2022

Impressiuns dils mirs sco els sepresentan suenter las lavurs da sanaziun.