Nums locals

Laax

Il pli vegl sigil ed ils pli vegls documents tradeschan aunc la vera derivonza dil num dalla vischnaunca: Lags. La fuorma «Lax» cumpara pér sin in sigil duvraus suenter 1424 e la fuorma «Laax» schizun pér el 16avel tschentaner. Il lag vegn numnaus per l’emprema ga en in document 1434 cura ch’ils Libers da Laax regalan agl uestg da Cuera il lag sul vitg. El Lag Grond anfl’ins era il glischun, igl animal da uoppen dalla vischnaunca da Laax.

Informaziuns davart la historia dil num da Laax anfleis Vus cheu: Laax - Il vitg sper ils lags

Ils nums locals da Laax

Las fontaunas per la gliesta alfabetica che Vus anfleis cheu sut, ein il Cudisch da nums retic da Robert de Planta ed Andrea Schorta, material digl Uffeci cantunal da mesiraziun, plinavon documents en possess dil Dicziunari Rumantsch Grischun ed auters. Als nums ein aschuntadas cuortas remarcas davart la specia da gudida (p.ex. acla, cuolm, èr, pastira, prau) sco ella sepresentava pli baul cu ins ha nudau sistematicamein ils nums.

Carta cun ils nums da funs

Igl onn 2018 ha la Fundaziun Pro Laax ediu ina carta cun ils nums da funs dalla vischnaunca da Laax. La carta san ins retrer per 5.- frs. (gratuit per habitonts da Laax) dalla canzlia communala.