Persunalitads

Uoppen dalla famiglia Montalta vid la «Casa Leunga» a Laax.

Christoph Joachim Anton de Montalta Entochen oz ei la veta da Christoph Joachim Anton de Montalta (1753–1844) da Laax aunc strusch vegnida perscrutada. Il motiv per quella munconza ha probablamein era da far cul fatg ch'ina part da siu relasch ei daventada igl onn 1874 in'unfrenda dil barschament dalla residenza da famiglia, la Casa Montalta (Casa Leunga). Sco davos representant masculin dalla famiglia ch'era ina lingia laterala dils Montalta da Sevgein ei il giuncher e colonel morts igl onn 1844 – senza haver schau anavos figlialonza ed ella vegliadetgna da 91 onns. Dapli informaziuns

Peter Coray Peter Coray ei naschius ils 30 da schaner 1843 e morts ils 16 da december 1930. El ha fatg carriera sco offizier en survetschs jasters. Da 1861 tochen 1870 anflein nus el en survetsch dil Papa. El regiment dils Zuavs participescha el era alla battaglia da Mentana nua che l’armada dil Vatican conquista ina victoria historica encunter las truppas da Giuseppe Garibaldi. Dapli informaziuns

Flurin Camathias Flurin Camathias ei naschius ils 6 da mars 1871 a Laax. Studis da teologia; spiritual a Breil, Andiast e Siat. Morts ils 3 da fevrer 1946. Flurin Camathias ei staus poet e scriptur romontsch. En sia ovra litterara sefatschenta el oravontut cun eveniments e fatgs dalla historia grischuna (La Ligia Grischa; Ils Retoromans; La Flur da Ramosch; Historias dil Munt s. Gieri). Flurin Camathias ei igl autur da biaras canzuns profanas e sacralas e vala sco versau translatur da poets tudestgs, slavs, catalans e provenzals. Sias ovras principalas ha la vischnaunca da Laax ediu 1971 el cudisch festiv «Ovras» per il tschienavel onn da sia naschientscha. Dapli informaziuns

Carl Strauss Carl Strauss ei naschius ils 4 d’october 1873 a Boston els Stadis Uni dall’America. Sias scolas e studis d’art meinan el ell’Europa. Morts ils 27 da settember 1957. 1915 arriva el neu dall’Italia en Svizra e secasa 1922 el «Straussennest» a Laax/Salums. Enconuschentas ein surtut sias gravuras che muossan detagls dalla natira. Siu relasch sesanfla el museum d’art a Cuera. Publicaziun: Toni Nigg, Trudi Caflisch (Bearb.): Nachlass Carl Strauss. 1873–1957. Ausstellungskatalog Bündner Kunsthaus, Chur 1974. Dapli informaziuns

Pieder Tuor Pieder Tuor ei naschius ils 19 da zercladur 1876 ad Aquila ell’Italia. El fa ina carriera academica ed ei staus professer da dretg allas universitads da Fribourg, Genevra e Berna. Morts igl 1. da november 1957. Suenter la mort dil bab, tuorna la famiglia a Laax, ella patria dalla mumma Onna Turtè nata Coray. Sper numerus tractats giuridics e historics valan sia translaziun romontscha dil Cudisch civil svizzer («Das Schweizerische Zivilgesetzbuch») ed ils commentaris leutir sco sia capoovra. Sia dissertaziun cul tetel «Die Freien von Laax. Ein Beitrag zur Verfassungs- und Standesgeschichte» (1903), ei ina contribuziun fundamentala alla historia retica dil temps miez. Pieder Tuor sauda tiels confundaturs dalla Romania (oz Surselva Romontscha) ed ei staus biars onns redactur digl «Ischi». Dapli informaziuns

Toja Isenring-Maissen Toja Isenring-Maissen ei naschida ils 3 da schaner 1919 a Glion. Suenter il diplom sco scolasta da lungatg a Genevra viseta ella la scola d’art a Turitg e las academias d’art a Perugia, Salzburg e Londra. Morta ils 3 d’uost 2014. Ella steva buca bugen el center. Perquei ha ella forsa era elegiu igl uclaun da Staderas agl ur da Laax sco liug da dimora nua ch’ella ha viviu cun sia famiglia dapi ils onns 1950. E leu haveva ella era siu luvratori ed atelier. El center steva sia lavur. Sias ovras artisticas da gener fetg multifar. La pictura sin fatschadas, ils maletgs abstracts e semi-abstracts, la pictura davos glas, da quellas filigranas sin candeilas e sin ovs da Pastgas, e las illustraziuns ch’ella ha fatg per cudischs d’affons: per il cudisch da praulas da Toni Halter, per il «Martin ed il Sontgaclau» e per il «Clapitsch» ch’ei vegnius undraus 1982 dil Departament federal digl intern cun il premi «pli bi cudisch d’affons digl onn». In catalog che presenta la vasta paletta da sia lavur ei cumparius igl onn 2004. Dapli informaziuns

Hans Moser Hans Moser ei naschius ils 13 da fevrer 1922 a Neuhausen el cantun Schaffusa. Suenter studis d’art e grafica els Stadis Uni dall’America frequenta el la Ecole des Beaux-Arts a Losanna. Morts ils 4 d’october 2012. Ils emprems onns da sia veta passenta Hans Moser en Svizra. 1926 emigrescha siu bab els Stadis Uni dall’America e 2 onns pli tard suonda era la famiglia. Duront decennis fa el numerusas caricaturas humoristicas per la revista satirica «Nebelspalter». In grond public contonscha el cun la figura dil «Herr Schüüch» ch’el ha creau pil «Nebelspalter». «Herr Schüüch» sedistingua dalla massa perquei ch’el vul buca star enta peis ad enzatgi e perquei ch’el emprova adina da salvar l’apparientscha. Naven da 1963 viva Hans Moser cun sia famiglia a Laax. El ei era staus activs sco columnist, ha scret artechels ed historias cuortas. En moda critica tractan ses dessegns savens era la destrucziun digl ambient e nossa relaziun cun animals. Per quei engaschament eis el vegnius undraus 1990 cun il premi da renconuschientscha Binding, in premi che vegn surdaus per engaschament special per la natira e la protecziun digl ambient. El decuors da sia carriera ha Hans Moser survegniu numerusas autras distincziuns per sia lavur sco cartoonist e caricaturist. Aschia per exempel la medaglia d’aur dalla 2. Biennale dell'Umorismo nell'Arte a Tolentino, Italia, 1963, la medaglia d’aur per il sboz d’ina marca postala al Salone Internazionale del Francobollo a Torino, Italia, 1969, il premi special dalla gasetta «Nova Makedonja» a cachun dalla Galerie mondiale de la caricature a Skopje, Macedonia, 1970, la palma d’aur a caschun dalla 28. exposiziun internaziunala a Bordighera, Italia, 1975, ed il Türler Pressepreis, 1986. La vischnaunca da Laax ha undrau Hans Moser cun ina senda che porta siu num, la «Senda Hans Moser». Il relasch da Hans Moser ei en possess dalla Fundaziun Pro Laax. Publicaziuns: Das ewig junge Volkslied (1955), Herr Schüüch – Aus dem Leben eines Zeitgenossen (ca. 1960), Heitere Chirurgie (1965), Mir ist alles Wurst... (1968), Die Mänätscher (1971), Mitlachen ist wichtiger als siegen (1972), Herr Schüüch lebt weiter (1973), Freie Fahrt (1975), Flims, weil’s nahe liegt. Ein Kurort 100 Jahre jung, belächelt und karikiert von Hans Moser (1977), Medizynisches (1984), Kopf hoch, Herr Schüüch (1987), Wenn schon, denn schon (1994), Humor im Alter ... ein Geschenk für Junggebliebene (?) Dapli informaziuns