Punct da partenza

2021/2022 ei la vischnaunca da Laax seregurdada da sur Flurin Camathias, poet e scribent, ch’ei naschius avon 150 onns.

Flurin Camathias ei naschius ils 6 da mars 1871 a Laax. El ei staus plevon a Breil, Andiast e Siat. Morts eis el ils 3 da fevrer 1946.
Flurin Camathias vala sco in dils pli impurtonts poets e scribents romontschs. Sias lavurs resplendan ses interess ed il spért da siu temps: patria, historia, religiun, natira.

Flurin Camathias ha scret e publicau texts da gener fetg different, da numnar ein en special las poesias ch’ein vegnidas messas en musica – ton profana sco sacrala. Enconuschents eis el era sco translatur d’ovras ord auters lungatgs (tudestg, slavic, provenzal, catalan).
Ina schelta da sias ovras ha la vischnaunca da Laax publicau igl onn 1971, a caschun da siu 100avel anniversari, el cudisch «Ovras».

Menziunar lein nus era ch’il text dalla canzun «La sera sper il lag» – ina dallas pli bialas ed enconuschentas canzuns romontschas – ei in’ovra da Flurin Camathias. Gion Balzer Casanova ha fatg la cumposiziun.

Il project VIVA FLURIN! ei vegnius purtaus e sustenius da biaras e biars: La vischnaunca, las uniuns e la scola da Laax, artistas ed artists dalla regiun.

Ina dallas finamiras principalas da quei project multi-tematic ei era staus quel da puspei clamar en memoria la persuna e las ovras da Flurin Camathias e d’era render accessibla quellas per ina nova/proxima generaziun.