Audiowalk

In Audiowalk ei ina spassegiada divertenta cun ina historia ch’ei enramada da ramurs e da musica. Cun uregliers san ins prender sut peis ina ruta nunenconuschenta. Il project «Tedlar il vargau – In die Vergangenheit horchen!» vegn concepius aposta per il project VIVA FLURIN!
Il Lag Grond: Ils da Laax, mo era numerus visitaders, enconuschan il lag amiez il vitg. Ins sa nua ch’ins anfla las caussas, nua ch’ils bauns da far in paus ein, tgei trutg ch’ins sto prender. Igl ei in liug per far ina spassegiada, in liug per far in paus ed – tut tenor stagiun – era in liug per activitads sportivas.

Ina vusch principala dat il ritmus, muossa la via entuorn il lag ed en vischnaunca. El decuors dalla spassegiada «cumparan» vuschs da persunas che habiteschan ni che scuvieran il vitg. Sper la plazza da giug aud’ins vuschs d’affons, lu las andas ed ils rustgs, cavals che train in carr. Surpresas davos ina caglia ni sut in baun...
Punct da partenza digl «Audiowalk» ei la Cularta, sper la tabla d’informaziun sin la plazza da parcar. La via meina dil Plaun dil lag, al «monument» da Laax, entuorn il lag e tier differents loghens el contuorn (Crap Fraissen, baselgia, fontaunas …) e terminescha puspei al punct da partenza. Igl «Audiowalk» – che vegn realisaus d’Anselm Caminada – ei in mix da tuns e suns en lungatg romontsch e tudestg.