ROMONTSCH Sprache umschalten DEUTSCH

Fontaunas

1895, pia avon 125 onns, ha il cauvitg Peter Coray (*1843-†1930) installau a Laax las fontaunas. Forsa ch’el – igl anteriur offizier d’in regiment dils Zuavs a Ruma – ha seschau inspirar dallas numerusas fontaunas dil «marcau perpeten».

La vischnaunca da Laax ha renovau ils davos onns las fontaunas el vitg, ed ussa tarlischan quellas en nova spledur. Sco regurdientscha al poet Flurin Camathias vegnan plazzadas vid las funtaunas citads ord poesias da Flurin Camathias. In QR-Code meina ils intertessai a dapli informaziuns.
Sco exempel lein nus menziunar en quest liug l’enconuschenta poesia «Primavera»:

	Fontaunas clar resunan,
	uals si cuolm naschi
	a val ei sesparunan
	e creschan mintga di;
	
	ei trai favugn migeivel,
	ei dat sulegl bi clar,
	quei ei il temps legreivel
	schi bials per viagiar.
	
	Jeu sentel la fladada
	dil vent sedestadau,
	la veta Ieventada
	sut tschiel serein e blau.
	
	Miu cor, er ti sesarva,
	canzuns fai sesalzar,
	passend tras nova jarva
	tgi less ca selegrar!
	
	Cantond sco las fontaunas
	jeu mon per cuolms e vals,
	legrias permavaunas
	jeu partel culs utschals;
	
	tras l'aria fina clara
	o matg, ti vegns ornaus;
	sche seigies en la tiara
	da cor beneventaus.