Project da chor

Cantar unescha pign e grond! Cantar ei ina aventura! Perquei han ils dus chors da Laax – Chor mischedau e Chor viril – realisau per il project VIVA FLURIN! in concert communabel.
Al concert ha era il Chor da dunnas Chursüd cooperau.

Aposta per quei concert e per igl onn giubilar han Gion Giusep Derungs e Gion Andrea Casanova cumponiu novas canzuns per chor sin basa da texts da Flurin Camathias.
Numerus cumponists, per exempel Hans Erni, Duri Sialm, Gion Antoni Derungs e Gion Balzer Casanova, han gia mess en musica texts da Flurin Camathias. Quellas canzuns ein in scazi prezius, in scazi cultural buca mo da e per la Surselva.

Cun quei project da concert levan nus era far enzatgei per las futuras cantaduras ed ils futurs cantadurs. Perquei ei vegniu fundau a Laax il Chor d’affons TICO (Ti Contas) ch’ei sepresentaus per l’emprema gada a caschun dil concert da giubileum che ha giu liug ils 14/15 da matg 2022.

Il DC-dubel cun registraziuns existentas e novas documentescha la lavur dil poet da Laax. Aschia eis ei garantiu che las canzuns cun texts da Flurin Camathias vegnan a resunar aunc ditg suenter igl onn giubilar. Il portatun san ins retrer per 25.- frs. + cuosts da spediziun dalla Fundaziun Pro Laax.
Empustar DC