Scartira giubilara

Plirs auturs/pliras auturas ein s’avischinai alla persunalitad da Flurin Camathias entras dilucidar differents aspects. Mintga capetel ei vegnius cumplettaus cun ina cuorta resumaziun en lungatg tudestg.
Per l’execuziun e coordinaziun dallas lavurs editorialas ei la Chasa Editura Rumantscha stada responsabla.

Auturas ed auturs dalla scartira giubilara:

Erwin Ardüser: Plaid sin via
Plaid sin via dil president dalla Fundaziun Pro Laax ed iniziant dalla scartira giubilara.

Leonard Caduff: Biografia
Nus publichein la biografia ch’il romanist ha giu scret 1956 en sia lavur «Sur Flurin Camathias. Il poet de Lags. In studi litterar, accumpignaus da texts digl autur», ina lavur ch’ei tochen oz aunc mai stada publicada.

Sandro Buchli: Aspect historic
Igl historicher sefatschenta cun la moda e maniera da luvrar da Camathias, descriva ils moviments da lura cugl aspect dalla romantica vs. il classicissem en l’ovra dil poet.

Bettina Berther: Aspect linguistic
La romanista descriva il moviment «da l’idea latina» che regeva l’entschatta dil 20avel tschentaner. Tenor l’autura selai constatar che tras il brat denter poets Romontschs e «Latins» ein ils Romontschs vegni pertscharts da bucca esser la suletta minoritad linguistica.

Laura Decurtins: Aspect musical
Da Camathias ein numerus texts vegni mess en musica. La musicologa descriva cun exempels concrets, e sin fundament dalla collaboraziun denter Camathias ed il cumponist Hans Erni, co ordinar e categorisar quellas canzuns.

Ursicin G.G. Derungs: Aspect pastoral
Il teolog furnescha ina contribuziun davart Flurin Camathias sco plevon e canoni, cun focus sin sia lavur ed activitad pastorala.

Remo Arpagaus: Skizzas persunalas
Egl artechel sefatschenta igl autur cun sia relaziun persunala cun Flurin Camathias.
Sco digient dil Chor viril da Laax ha Remo Arpagaus era giu la finamira da rimnar, inventarisar e digitalisar las ovras – era las canzuns (partituras) – da Flurin Camathias. Era quella lavur duei – independent dalla scartira giubilara – vegnir fatga accessibla alla publicitad.

Pieder Tuor: Necrolog
Il professer da dretg, e bien amitg da Flurin Camathias ha publicau en la Gasetta Romontscha dils 7 da fevrer 1946 in plaid sur fossa dil sacerdot e poet che nus integrein en la publicaziun.

Fidel Camathias: Regurdientschas e reminiscenzas
1971, per il 100avel anniversari da sur Flurin ha sur Fidel Camathias mess sin pupi e publicau ella Gasetta Romontscha regurdientschas e reminiscenzas en connex cun siu convischin da Laax. Era quellas ein d’anflar ella scartira giubilara.

Renzo Caduff: Bibliografia
Per incumbensa dalla Pro Laax ha igl autur rimnau e cataloghisau igl onn 2005 il relasch litterar da Flurin Camathias. Ella bibliografia publicada el cudisch ein nudadas las ovras e lavurs las pli impurtontas dil scribent e poet da Laax.

Selecziun ovras
Ina schelta da poesias vegn integrada ella scartira giubilara.

Documents e fotografias
Documents e fotografias ord archivs e relaschs privats cumpletteschan ils texts ed illustreschan veta e lavur da Flurin Camathias.

Theres Jörger/Marie Cuennet, Susanne Stauss: Grafica e fotografias
Theres Jörger/Marie Cuennet han fatg il concept per la visualisaziun e presentaziun dils texts e dil material illustrativ. La fotografa Susanne Stauss ha visitau ils loghens principals ch’ein stai d’impurtonza per la veta e la lavur da Flurin Camathias.

La publicaziun san ins retrer per 35.- frs. + cuosts da spediziun dalla Fundaziun Pro Laax.
Empustar