DEUTSCHSenda Hans Moser
1997, per siu 75avel anniversari, ha la vischnaunca da Laax regalau a Hans Moser ina senda che porta siu num, la «Senda Hans Moser». Ella meina sin ina distanza da ca. 400 m da Laax en direcziun Falera. 1966, suenter ch’el haveva habitau avon entgins onns a Flem, ha il caricaturist baghegiau ina casa en quella spunda cun vesta sur il vitg da Laax.«All’entschatta vev’ ei negin tgaun», ha Hans Moser raquintau inagada en in artechel cumparius ella gasetta. Il caricaturist ha creau la figura dil Closchi igl onn 1983 per la gasetta regiunala «Arena Alva». «Cura che Closchi ha survegniu in tgaun, ei sia veta semidada, el ha survegniu in amitg».
Sco sia figura Closchi spassegiava era Moser savens cun siu tgaun tras Laax e la regiun maneivla e commentava tut quei che deva en egl. Mintgaton raquenta Closchi enzatgei sur da sesez, fa patratgs davart igl ambient, il turissem ed ils carstgauns dalla regiun. Siu tgaun ei adina in accumpignader fidau.
Moser ha remarcau biaras parallelas denter el e sia figura dil Closchi: «Era jeu sun in individualist e sai star fetg bein mo cun mei. Era jeu hai bugen la natira e beibel bugen ina gervosa». Duront biars onns ei Hans Moser era s’engaschaus a Laax per la protecziun dils amfibis, e quei ei lu era stau il motiv ch’el ha survegniu il surnum «Frosch Moser».
Tgei veseva Hans Moser ord siu atelier, co splendurava il sulegl sur la val, tgei manegiava siu tgaun da quei entir battaclanc?
Da sia vesta ord igl atelier ha el in gada detg: «Cheu ei il cor da Laax, ed en quella regiun dat ei adina tematicas per mias caricaturas.»