La situaziun geologica

La ruttadira inversa glarunesa

Il vitg da Laax ei situaus enamiez la scenaria dall'Arena tectonica Sardona. Part da quella ei la ruttadira inversa glarunesa – in fenomen extraordinari. Vid questa ruttadira inversa enorma han ins studegiau ils mecanissems dalla formaziun dallas Alps duront ver 200 onns. La formaziun dils pli impurtonts e dils pli gronds massivs san ins suandar cheu specialmein bein. Ultra da quei dat ei in grond interess nuninterrut da perscrutar differentas damondas geologicas en quei territori. Quei ha intimau l'UNESCO da registrar l'Arena tectonica Sardona igl onn 2008 ella gliesta dil Patrimoni natural mundial (20; 21; 26).

La collisiun dils continents originars dall'Africa e dall'Europa ha giu per consequenza el territori dalla Val dil Rein Anteriur dad oz grondas pressiuns che han smaccau ensemen la crappa. Ils pachets da crappa – per part plirs kilometers gross – ein vegni stuschai in sur l'auter ad aschinumnadas «cozzas». Il moviment da stausch ha giu liug en profunditads da tochen 16 kilometers sut la surfatscha dil terren da quella ga e cun in spustament en media da paucs centimeters ad onn. El territori dalla ruttadira inversa importavan las temperaturas tochen 320 °C e la pressiun tochen 5 kilobars. (21)

Il territori da Laax s'auda geologicamein tier igl «helveticum». Las cozzas stuschadas ina sur l'autra numnan geologs «helveticum superiur». Sut quellas sesanfla la cuvrida da sediments digl «helveticum inferiur» («infrahelveticum») che schai directamein sil massiv dall'Aara. Quella ei vegnida stuschada mo levamein cun il massiv da basa cristallin. Dallas ruttadiras inversas egl helveticum inferiur ein denton resultadas pliras ruttadiras inversas e faldaziuns che cumpeglian pigns territoris.

La ruttadira inversa la pli marcanta enteifer igl «helveticum» ei la ruttadira inversa glarunesa. Sia caracteristica la pli remarcabla ei la lingia clara bein veseivla che va atraviers las preits crap dil Crap Grisch (Laaxerstöckli), dallas Dunschalas (Tschingelhörner), digl Atlas, dil Péz Dolf, dil Péz da Sterls (Tristelhorn)e dil Péz Bargias (Ringelspitz). Sur quella «lingia magica» sesanfla per il pli crappa pli stgira e massiva che fuorma las preits. Quella aschinumnada «crappa da verrucano» ha ina vegliadetgna da 250 tochen 300 milliuns onns. Sut la lingia ella part settentriunala dil Patrimoni natural mundial sesanfla crappa grischenta da plattamorta, aschinumnada «crappa da flisch» cun ina vegliadetgna da 35 tochen 50 milliuns onns. Ella part meridiunala (Péz Bargias, Fil da Cassons, Péz Grisch) sesanfla sut la lingia crappa da caltschina clar-grischa ch'ei 100 tochen 150 milliuns veglia. Ella regiun dallas Dunschalas sesanfla la caltschina clar-grischa denter la crappa da flisch grischenta e la crappa da verrucano. Quella crappa da caltschina ei aschinumnai pachets da crappa ch'ein vegni «stratgs» ensemen cun la gronda massa muentada. Cun la lingia sezza cunfinescha l'aschinumnada «caltschina da Lochsiten», in crap da caltschina melnent che regorda a marmor e ch'ei cheu per il pli mo 0,5 meters lads. El ei seformaus pér duront la ruttadira inversa ed ha per part era surviu sco «mied dad unscher». (21)

Duront il process dalla formaziun dallas muntognas ein las Alps sesalzadas e vegnidas exponidas all'erosiun tras flums e glatschers. Rests dalla cozza glarunesa anflan ins aunc sin il Crap da Flem sco aschinumnai scogls (Klippen), ella part occidentala e settentriunala dil territori communal era sco stresa coherenta. Quels relicts secumponan exclusivamein da verrucano (39). Ils sediments depositai antruras sissu ein erodai cumpletamein. La ruttadira inversa vesan ins particularmein bein vid las Dunschalas ed igl Ofen e si Sur Crap (Grauberg). Il moviment ha entschiet avon ver 35 miu. onns en ina profunditad da 12-15 km. (26; 27)

Cun igl alzament e l'erosiun ein las stresas da sediment sut la cozza glarunesa vegnidas neunavon. Ei setracta da differentas sorts da crappa dallas eras geologicas dil trias, dil giura e dalla crida. Particularmein voluminus ein ils craps da caltschina dil malm dil giura tardiv (caltschina da Quinten, per part caltschina da Tros). (26; 14)

La formaziun da karst

Nossa atmosfera cuntegn da natira enneu dioxid carbonic (CO2). En reacziun cun l'aua da precipitaziuns (H2O) sefuorma acid carbonic (H2CO3). Igl acid carbonic attacca la caltschina (calcit, CaCO3). Ell'aua sefuorman ions da calzium (Ca++) e da carbonat hidrogen (HCO3-). Quels lava l'aua da plievgia naven tgunsch. La corrosiun karstica resulta dalla «dissoluziun» chemica progredenta dalla caltschina. Tratgs caracteristics dalla corrosiun karstica progredenta ein camps crenai, cuvels da karst cun stalagmits e stalactits, cuors dall'aua sutterrans, ruosnas sbuadas (dolinas), ruosnas da sfundrada (ponors) e fontaunas d'aua da karst (36). El territori da Flem-Laax han ins cumprovau ils suandonts treis sistems da karst extendi el rom da provas da coluraziun (19):

1. la regiun Vorab – Sur Crap ch'ei colligiada cun las fontaunas Lag Tiert, Lag Prau Pulté, Val Davos resp. tunnel da sviament e che cumpeglia circa 15 km2.

2. la regiun sur Tarschlims, nua che l'aua sbucca ellas fontaunas Tarschlims e Platt'Alva e che cumpeglia circa 12 km2. Pervia dallas tschaffadas d'aua ei la regiun fetg impurtonta per il provediment d'aua da Flem.

3. la regiun dil Crap da Flem e da Bargis, nua che l'aua sbucca ellas fontaunas da Trin Mulin. Tenor la carta topografica mesira igl intschess hidrografic ver 31 km2. Las fontaunas ein denton memia pintgas per quella surfatscha. In cert quantum d'aua sto sortir enzanua auter.

La formaziun dallas vals

La Surselva e sias vals lateralas ein vegnidas modelladas ils davos 2,6 miu. onns alternontamein da glatschers e da flums. Las valladas alpinas Plaun Segnas Sura e Plaun Segnas Sut sco era la pintga Val da Bargis han il Glatscher da Segnas resp. il Glatscher da Bargis marcau fermamein. Ils uals transporteschan incuntin garvera e lain seformar planiras alluvialas cun in'atgna dinamica.

La Val dil Rein Anteriur ei marcada fermamein da flums e da glatschers. Ella part occidentala da Laax anflan ins aunc oz alla surfatscha craps erratics e rests da morenas lateralas (03) dil glatscher dil Rein. Specialmein en egl dattan blocs da granit da Punteglias. Ils glatschers han denton era transportau verrucano e depositau quel en morenas. La formaziun dalla Ruinaulta cun sias planiras alluvialas, las islas, ei in process cuntinuont che ha entschiet en sia fuorma dad oz pér suenter la bova dil Crap da Flem (27).

La bova dil Crap da Flem

In element caracteristic per la cuntrada ein senza dubi las restonzas dalla bova dil Crap da Flem e la Ruinaulta encrenada lien. Avon 9450 onns ei ina massa da grep d'in volumen da circa 10-15 km3 (10-15 mia. m3) sbuada ed ha empleniu la Val dil Rein Anteriur denter Glion e Panaduz (34; 12; 13; 11; 26). Ei setracta dallas sorts da crappa che fuorman aunc oz il Crap da Flem: per gronda part ei quei crap da caltschina dil giura (malm, caltschina da Quinten), suren suondan craps da caltschina dil temps da crida e pauc verrucano (rests dalla cozza glarunesa). A Flem vesan ins en singuls loghens directamein la surfatscha da lischnada. Ella suonda la stratificaziun ella caltschina da Quinten cunfinonta, fuorma denton scalems locals, aschia che la surfatscha da lischnada ei spustada viers sid successivamein sin in nivel pli bass. (34; 26)

Igl ur occidental dalla zona da sedimentaziun dallas restonzas dalla bova passa el territori dil Lag Grond e dil Lag digl Oberst (29). La part la pli settentriunala a Plaun ei cuvrertga cun caltschina da Quinten digl helveticum inferiur che l'erosiun ha fatg vegnir cheu alla surfatscha avon la bova dil Crap da Flem. Pli el sid sesanfla sut la massa da bova il verrucano dalla cozza glarunesa e suenter il verrucano da Glion. (39; 25; 11)



D'impurtonza particulara per capir la hidrologia dils lags da Flem e da Laax ei la structura dallas restonzas dalla bova. Il grad dalla smardigliada ei suttamess a differenzas localas considerablas. Ina smardigliada cumpleta ha la caltschina alva subiu. Quella dat dapart cun ina marclada en sablun e puorla da crap. En auters loghens san ins aunc distinguer dalunsch ina structura interna stratificada e faldada. Quella crappa pauc smardigliada sa haver diameters da plirs tschiens meters. Apparentamein ha il current dalla bova buc entschiet a flessegiar en general a moda turbulenta. Anzi, igl ei da supponer ch'el ei semuentaus sco bloc pli grond ch'ei vegnius smardigliaus cunzun tras la collisiun cun la cunterspunda. (26)

Alla surfatscha eis ei da supponer dapli moviments da flussiun. Quels han formau ils rempars e depositau gronds blocs da crappa cun in diameter da plirs meters ella part superiura dallas restonzas dalla bova. Probablamein ein quels blocs da crap quasi senudai sin il fundament ch'era en moviment. (26)

La massa dalla bova dil Crap da Flem ei lischnada el vau dil Rein ed ha per part stuschau dalla vart alluviuns ed ils sediments existents digl anteriur Lag da Panaduz. Grazia a quei aschinumnau chis da Panaduz san ins dir oz che la bova dil Crap da Flem ei pli giuvna che la bova da Tumein (27).

Cun emplenir il sectur dalla Val dil Rein Anteriur ei ultra da quei seformaus in rempar natural enorm. Igl ur sura da quei rempar tunscheva denter Valendau e Versomi tochen a ver 820 m s.m. Davos il rempar ei igl anteriur Lag da Glion s'emplenius enteifer ca. 1-2 onns, igl emprem empau pli spert, lu pli plaun, perquei ch'ina part dall'aua sfundrava ni culava tras il material sbuvau. Quella situaziun ei probablamein restada tuttina plirs onns alla liunga. Sin fundament d'observaziuns da situaziuns semegliontas san ins supponer ch'ei ha lura dau alla surfatscha igl emprem crenas pli pintgas che han lavau ora il material fin. Pér empau pli tard han erupziuns d'aua pli grondas lavau ora lozza, chis e tocca dallas restonzas dalla bova. Cun avunda forza erosiva ha l'aua anflau ina via tras la lozza e las restonzas dalla bova ed ei secavada tras la Ruinaulta ch'ei seformada plaunsiu. (34; 26; 27)

Val Drauss e Val da Mulin

Igl Ual Draus (tochen al Lag Isla), resp. igl Ual da Mulin (dil Lag Isla tochen il Rein) han anflau ina via tras ils craps da caltschina digl helveticum inferiur (crida, giura). Ella Val Plaun (Ual Draus) suonda el la ruttadira denter ils craps da caltschina digl helveticum inferiur ed il verrucano digl helveticum superiur dalla cozza glarunesa. Da Runca tochen al Rein ei il grep vegnius cuvretgs dallas restonzas dalla bova dil Crap da Flem. Igl Ual da Mulin erodescha ussa quella cuvrida. En in liug el sidvest da Planezzas vesan ins el vau dil flum gia puspei verrucano che cuchegia ord las restonzas dalla bova (28).



La Val da Mulin ei ina dallas pli impressiunontas e pli activas vallatschas erosivas dallas Alps. Suenter fermas precipitaziuns meina igl ual bia garvera e procura aschia che la cavorgia vegn aunc pli profunda ed aunc pli lada. Tuttina paran las preits resultadas dalla bova remarcablamein stabilas. Quei stat en connex cun la cumposiziun dalla breczia da bova. Egl intern eis ella dira, resistenta e per gronda part schetga. Plinavon cuntegn ella neginas stresas d'arschella pli vastas – che favorisassen per exempel ina sbuada – ed era neginas sfendaglias profundas che savessen haver per consequenza distaccadas. La heterogenitad dil material porscha denton all'aua surfatschas d'attaccar. Aschia ein las tuors admirablas seformadas.



Duront la fasa ch'il Lag da Glion s'empleneva cun lozza, sbuccava igl Ual da Mulin sper la ruina dil casti da Schiedberg a Sagogn sin in ault livel el lag e procurava leu per deposits da delta extendi (28). Pér pli tard e cun secavar pli e pli profund ella Val da Mulin ha igl Ual da Mulin anflau ina nova via.