ROMONTSCH Sprache umschalten DEUTSCH

Lag Artificial Nagens

Il Lag Artificial Nagens sesanfla en in fiep natural che cunfinescha cun ils sediments dalla bova dil Crap da Flem, denter Platt'Alva e La Crappa, sin 1950 m s.m. En media ha el ina ladezia da 170 m ed ina lunghezia da 165 m. Cun in'altezia da retenida dad 11 m importa siu volumen d'accumulaziun 200'000 m3. Il funs dil lag ei isolaus e cuvretgs cun in vlies da protecziun che tonscha tochen agl ur sura dil fiep. Las spundas e las rivas ein munidas cun ina scarpa da blocs da crappa (35).


Il Lag Artificial Nagens. Foto Mapio.net

Il lag artificial han ins construiu igl onn 2007 sco ovra communabla dalla Flims Electric AG, dall'Arena Alva SA e dallas vischnauncas da Flem, Laax e Falera.

Igl intent dil lag artificial ei en emprema lingia da procurar per aua per enneiver las pistas da skis ella part ost dall'Arena Alva. Oriundamein era previu da menar l'aua directamein naven da Punt Segnas ord il Flem. Cun realisar la Sinfonia d'aua a Flem eis ei stau pusseivel da menar l'aua igl emprem via in conduct da pressiun ella nova centrala Punt Gronda per nezegiar ella per la producziun d'electricitad. La stad, cura ch'il Flem meina bia aua a Punt Segnas, sa l'aua vegnir transferida aschia senza energia jastra via in sifon a Punt Gronda el Lag Artificial Nagens da tschella vart dalla val. Igl unviern san ins duvrar quella aua cun in'aulta pressiun naturala e cun in basegns d'energia minimal per enneiver las pistas (17).

Il lag artificial han ins colonisau cun litgivas gaglias. Quellas san ins pescar (23).