Lag Grond

Il Lag Grond ei situaus amiez il vitg da Laax. El ei ver 350 m liungs e 150 m lads. Sia surfatscha mesira circa 5 ha. Sia profunditad maximala importa 5,5 m ed el sesanfla sin 1016 m s.m. (38).

Il lag vegn circumdaus d'ina riva naturala cuvretga per gronda part cun canna. Entuorn il lag meina ina senda. El sid ei ina fontauna siglienta installada.



Ils meins da stad semida il Lag Grond en in lag da far bogn popular. Cunquei ch'el ei buc aschi profunds, sa l'aua sescaldar tochen a 25 °C. Alla riva dil lag sesanfla il bogn aviert idillic da Laax (30).

El Lag Grond vivan denter auter glischuns, carpiuns, percas, tincas, scarduns, plotras e bramas. Igl ei lubiu da pescar (38).

El Lag Grond afflueschan cunzun pigns uals dalla Val Fraissen. Igl intschess hidrografic ei situaus el verrucano dalla cozza glarunesa e transportescha garvera cun minerals silicatics. Auters affluents derivan da differentas fontaunas el territori da Grava. Quella part digl intschess hidrografic secumpona da restonzas caltschinusas dalla bova.

Dapi la construcziun dalla nova Via dil Lucmagn ils onns 1960 defluescha l'aua via in bischel ella Val da Mulin (09; 12; 13).



A maun da nuschegls da sondaziun digl onn 2003 eis ei pusseivel da suandar la formaziun ed il svilup dil lag (12; 13). Giusum consista il funs dil lag da fragments da caltschina dallas restonzas dalla bova chittai cun puorla da crap (breczia da bova). Aschia ei il funs vegnius isolaus bein. Suren suondan stresas da material caltschinus siltus tochen gries ch'ei vegnius alluviaus e depositaus el decuors d'in pèr tschentaners tras las pintgas chinettas. Pli tard e tochen el temps recent ei il funs dil lag s'emplenius cunzun cun glera organica. Denteren secattan adina puspei stresas cun dapli material silicatic. Quei san ins attribuir a fermas precipitaziuns periodicas cun in'erosiun augmentada egl intschess hidrografic. Ina singula stresa intermediara remarcabla da carbonat da glera ei in indezi per l'afflussiun da craps da caltschina vischinonts ni da breczia da bova. (12; 13).

Remarcabels ei il cat d'in toc lenn pli grond ella part il pli giudem d'in nuschegl da sondaziun. Sia vegliadetgna correlescha dètg bein cun auters cats e confirmescha che la bova ei ida aval avon 9450 onns (11, 12).

Cun ils nuschegls da sondaziun ed il toc lenn datau han ins saviu demussar ch'il Lag Grond ei seformaus pér suenter la bova.