Lag Sec

Il Lag Sec sesanfla agl ur meridiunal dil vitg. Antruras era el colligiaus directamein cun il Lag Grond. En cass d'aua gronda, damai suenter fermas precipitaziuns e cura che la neiv luava, afflueva il surscul dil Lag Grond directamein el Lag Sec ed empleneva quel pli u meins tochen sum. Duront periodas schetgas pli liungas e cunzun igl atun ed igl unviern schigiava quei lag mintgamai vi dil tuttafatg. Da cheu deriva probablamein era il num «Lag Sec».

La deflussiun dil Lag Sec era, cunzun d'aua gronda, in prighel potenzial. In'undada sc'in dargun pudeva tonscher tochen el vitg da Sagogn e penetrar ellas casas. Perquei ha la vischnaunca da Sagogn acquistau igl onn 1659 il dretg dil proprietari da quella ga, Hans Alleman, da schar defluir l'aua directamein ella Val da Mulin (05).

Schebein l'aua vegneva defluida aschia gia naven dil Lag Grond ni pér naven dil Lag Sec, selai buca dir a maun dils documents disponibels. En mintga cass han ins saviu cumprovar pli tard ina deflussiun directa dil Lag Grond ella Val da Mulin. Quei vesan ins era sin la carta geologica digl onn 1933 (04; 23). Cunquei ch'il Lag Sec survegneva negina aua pli, eis el terrenisaus tec a tec e svanius dil tuttafatg dapi la fin dil 19avel tschentaner. Dapi igl onn 1983 sesanfla leu la plazza da sport Lac Sec cun la plazza da ballapei.