Lag Isla

Il Lag Isla ei in lag d'ulivada artificial sper la Via Sursilvana alla spartgida encunter Murschetg. Igl intschess hidrografic sesanfla denter Nagens, Vorab, Crap Masegn e Crap Sogn Gion. L'aua digl Ual Draus e digl Ual Buglina vegn retenida el lag artificial (Lag Isla). Via in conduct da pressiun flessegia l'aua ella centrala Bargaus sut Sagogn (15).



L'ovra electrica Bargaus ei en funcziun dapi ils 20 da december 1962. Ella ei situada sin 667 m s.m. ed ei equipada cun ina turbina da Pelton a dus ejecturs d'axa horizontala che nezegia ina pendenza brutta da 391.80 m. La prestaziun dalla turbina importa 2820 kW. L'ovra ei concepida per ina quantitad d'aua utilisada dad 960 l per secunda. Ins quenta cun ina producziun d'energia netta d'intragliauter 13'000 MWh per onn (15).

L'aua cula anavos egl Ual da Mulin cuort avon ch'el sbucca el Rein Anteriur sper la staziun da Valendau.

Ina part dall'aua da karst cula denton buca pli sur il Lag Tiert, mobein tras il tunnel da sviament da Flem. Dapi igl october 2002 culan pervia dalla perfuraziun dil karst duront la construcziun dil tunnel grondas quantitads d'aua ord il tunnel da sviament. Cura che la neiv liua san quei esser dapli che 700 l per secunda. Sper la cavorgia «Felsbach» a Trin ei en funcziun dapi ils 6 d'october 2011 in'ulteriura ovra electrica cun ina quantitad d'aua utilisada da 500 l per secunda (15). Quella nezegia la pli gronda part dall'aua che cula ord il tunnel per producir electricitad.